अत्याधिक हिंसात्मक दृश्यका कारण रोकियो ‘ताण्डवम्’को सेन्सर

काठमाडौं । केन्द्रीय चलचित्र जाँच समिति (सेन्सर बोर्ड)ले हिंसात्मक दृश्यमा आपत्ति जनाउँदै फिल्म ‘ताण्डवम्’लाई प्रदर्शन अनुमति दिन अस्वीकार गरेको छ । मंगलबार बेलुका यो फिल्म जाँच गरिएको थियो । केही दृश्यहरु अत्याधिक हिंसात्मक भयो भन्दै सिनेमा सेन्सरमा रोकिएको छ ।

सेन्सर रोकिएसँगै आज बुधबारलाई चलचित्रको निर्माण टिमले आयोजना गरेको प्रिमियर शो समेत स्थगित गरिएको छ । चलचित्र हेरेपछि सेन्सर बोर्डका सदस्यहरूले अत्याधिक हिंसात्मक दृश्य भएको भन्दै ती दृश्य काँटेर ल्याउन भनेको निर्देशक जुनिम गहतराजले जानकारी दिए ।

अब, ती दृश्यहरु काँटेपछि सिनेमाको जुन मर्म छ त्यो मर्छ । दृश्य काँटछाँट नगरी ‘एडल्ट सर्टिफिकेट’ दिनका लागि निर्माणपक्षले गरेको आग्रहलाई पनि सेन्सरमा अस्विकार गरिएको छ । त्यससँगै सिनेमामा रहेको ६ मिनेट लामो हिंसात्मक दृश्यलाई ३ मिनेटमा घटाउन निर्देशन दिएको निर्देशक जुनिम गहतराजले बताए ।

सेन्सर बोर्डले फिल्म रोकेपछि बुधबार हुने भनिएको फिल्मको प्रिमियर समारोह रोकिएको छ । ‘ताण्डवम्’ महाशिवरात्री छेकोमा फागुन ९ गते प्रदर्शन तयारीमा छ ।