उमाकान्त पौडेल स्मृति पत्रकारिता पुरस्कार दवाडीलाई प्रदान गरिने :

ललितपुर । नेपाल पत्रकार मञ्चले स्थापना गरेको श्री उमाकान्त पौडेल स्मृति पत्रकारिता पुरस्कार वरिष्ठ सञ्चारकर्मी शिरोमणि दवाडीलाई प्रदान गर्ने निर्णय गरेको छ ।
ललितपुरको लाकुरी भन्ज्याङमा शनिवार सम्पन्न बैठकले झण्डै ३ दशकदेखि विभिन्न सञ्चारमाध्यममा क्रियाशील दवाडीलाई उक्त पुरस्कार प्रदान गर्ने निर्णय गरेको हो ।
नेपाल पत्रकार मञ्चका पूर्व महासचिव राम पौडेलका स्वर्गीय पिता उमाकान्त पौडेलको स्मृतिमा स्थापना भएको उक्त पुरस्कार उपाध्यक्ष विमल थापाको संयोजकत्वमा गठित पुरस्कार छनौट समितिले दवाडीलाई प्रदान गर्ने निर्णय गरेको थियो ।
नेपाल पत्रकार मञ्चको स्थापना दिवसका अवसरमा आगामी चैत्र ३० गते विशेष कार्यक्रमका साथ दवाडीलाई उक्त पुरस्कार प्रदान गरिने नेपाल पत्रकार मञ्चका अध्यक्ष युवराज विद्रोहीले जानकारी दिए ।
यसैगरी, बैठकमा शिक्षासेवी नारायण आचार्यका स्वर्गीय मातापिता यानकुमारी आचार्य तथा इन्द्रप्रसाद आचार्यको स्मृतिमा श्री इन्द्रप्रसाद–यानकुमारी आचार्य स्मृति शैक्षिक पत्रकारिता पुरस्कार घोषणा गरिएको छ । ११ हजार १ सय ११ रुपैयाँ राशीको उक्त पुरस्कार शैक्षिक पत्रकारिताको क्षेत्रमा सक्रिय योगदान गर्ने एकजना पत्रकारलाई हरेक बर्ष प्रदान गरिनेछ ।
बैठकले पुरस्कार स्थापना गर्ने पौडेल र आचार्यलाई कृतज्ञता प्रकट गर्दै हरेक बर्ष पत्रकारिताका विभिन्न विधामा योगदान गर्ने पत्रकारहरुलाई विभिन्न १० विधामा पुरस्कार प्रदान गर्दैै आएको नेपाल पत्रकार मञ्चले जनाएको छ ।