अष्ट्रेलियाबासी नेपालीले दशैँ तिहार मान्ने समय बारे अन्तर्राष्ट्रिय पञ्चाङ्ग निणर्य समितिको स्पष्टता

वैदिक परिषद् अस्ट्रेलियाबाट प्रकाशित “भास्कर नेपाली पञ्चाङ्ग” मा विजया दशमी (टीका) र लक्ष्मी पूजा नेपालका पञ्चाङ्गसँग फरक हुन गएको भन्दै अन्तर्राष्ट्रिय पञ्चाङ्ग निणर्य समितिले स्पष्ट पारेको छ।समितिका सभापति प्रा.डा.माधव भट्टराई तथा सदस्य सचिव लक्ष्मण पन्थीद्वारा हस्ताक्षरित बिज्ञप्तीमा कतै कतै सन्देह उत्पन्न भएको भन्ने जानकारी प्राप्त भएकाले स्थानीय तिथ्यादिको मानअनुसार धर्मशास्त्रले तोकेको कर्म कालअनुुसार चाड पर्वादि मनाउन स्पष्ट पारिएको खुलाइएको छ।

बिज्ञप्तिमा उल्लेख गरिए अनुसार अस्ट्रेलियामा मनाइने विजया दशमी पर्वको दशमी तिथि उदयकालीन २०८१ आश्विन २७ गते (२०२४ अक्टोबर १३ तारिक) भएकाले अस्ट्रेलियामा यसै दिन विजयादशमी (टीका) ग्रहण गर्नुपर्नेछ । नेपालमा २०८१ आश्विन २६ गते (२०२४ अक्टोवर १२ तारिक) सूर्योदयकालीन दशमी तिथि भएको र २७ गते सूर्योदय कालमा दशमी तिथि नहुनाले नेपालमा अश्विन २६ गते नै विजया दशमीे मनाउनु पर्नेछ ।

यो पर्व तिथि प्रधान भएकाले श्रवण नक्षत्र पर्दा यसको प्रशस्त्य हुने र यो नक्षत्र विजया दशमीको कारक नभएकोले विजया दशमीको टीका नेपालमा आश्विन २६ गते र अस्ट्रेलियामा आश्विन २७ गते मनाउनु हुन विज्ञप्तिमार्फत स्पष्ट पारिएको छ । पुनश्चः लक्ष्मी पूजा ः अस्ट्रेलियामा लक्ष्मी पूजा औँशी तिथि सन्ध्या काल २०८१ कार्तिक १६ गते (२०२४ नोभेम्वर १ तारिक) भएकाले अस्ट्रेलियामा (नोभेम्वर १ तारिक) यसै दिन लक्ष्मी पूजा गर्नुर्ने र नेपालमा २०८१ कार्तिक १५ गते (२०२४ अक्टोवर ३१ तारिक) मा सन्ध्या कालमा औँशी तिथि भएकोले १५ गते नै लक्ष्मी पूजा गर्नुपर्ने बताइएको छ।