आज तीजको रमझम देशभर, पशुपतिनाथमा लाखौंको उपस्थिति

 हिन्दू नारीहरूको महान पर्व हरितालिका (तीज) का अवसरमा आज काठमाण्डौस्थित पशुपतिनाथ मन्दिर तथा देशभरका मन्दिर तथा शिवालयमा बिहान सबेरैदेखि महिला भक्तजनको भीड लागेको छ । पशुपति क्षेत्र विकासले दिएको जानकारीअनुसार पशुपतिमा आज बिहान २ बजेदेखि नै लाममा बसेका कारण दर्शन गर्न सहज होस भनेर बिहानै ३ बजे नै पशुपतिका चारै ढोका खोलिएको थियो। पशुपति मन्दिरभित्र प्रवेशका लागि तीनवटा लाइनको व्यवस्था गरिएको छ। पहिलो पङ्ति बनकाली–पञ्चदेवल हुँदै दक्षिण ढोकाबाट, दोस्रो पङ्ति जयवागेश्वरी–भुवनेश्वरी मन्दिर हुँदै पश्चिम मूलढोकाबाट र तेस्रो पङ्ति गौरीघाट–उमाकुण्ड–रुद्रगाडेश्वर हुँदै उत्तरढोकाबाट मन्दिर प्रवेश गर्ने व्यवस्था गरिएको छ। बिकास कोषका अनुसार पशुपति प्रवेशमा कुनै पनि पासको व्यवस्था गरिएको छैन। लाम व्यवस्थित गरिएकाले गौशाला–चाबहिल सडक खुला रहेको छ । बिहान १० बजेसम्म करिब २ लाख दर्शनार्थीले मन्दिर दर्शन गरिसकेका छन् । आज पशुपतिमा अन्य विशेष पूजाको कार्यक्रम राखिएको छैन । बिशेष पर्व तथा मेलाहरूमा राष्ट्राध्यक्षले दर्शन तथा पूजा गर्ने चलन रहँदै आएकोमा राष्ट्रपति विद्यादेवी भण्डारीले आज साँझ ६ बजे पशुपतिनाथको दर्शन गर्ने कार्यक्रम रहेको पशुपती विकास कोषले जनाएको छ।

– कवच सम्वाददाता,काठमाडौ ।