सप्तरी – मिथिलाञ्चलको इतिहास, संस्कृति तथा लोकगाथासँग जोडिएका ऐतिहासिक तथा प्राचीन लोकनाच दिन प्रतिदिन लोप हुन थालेको छ । ऐतिहासिक नाच लोप हुन थालेपछि कलाकारहरू पनि विदेश पलायन हुने क्रम बढे्को छ ।
मिथिला क्षेत्रको ऐतिहासिक तथा प्राचीन राजा सहलेस, शितवसन्त, रुनाझुना, जङ्गली बादशाह, गोपीचन्द कुँवर वृजभान, सुन्दर वनको सुन्दर फूल, अल्लाह रुदल, गुगलीघाट, समाचकेवा, कमलामैया, जयविसहरा, दुलहा दयालसिंहजस्ता नाचहरू लोप हुन थालेका हुन् ।
विगत चार दशकदेखि यस्तो नाच देखाउँदै आएका सप्तरीको छिन्नमस्ता गाउँपालिका–१ का कलाकार बौयन रायले उहिले नाचको राम्रो माग भएकाले २० जना कलाकारलाई भेला गरी एउटा नाच कम्पनी बनाएको तर अहिले नाच लोप हुन थालेपछि कलाकारहरू नै रोजीरोटीका लागि विदेश पलायन हुनुपर्ने अवस्था आएको बताउनुभयो । २० वर्ष पहिले नाच देखाएरै वार्षिक १० लाख रुपैयाँ कमाउने गरेको उहाँको अनुभव छ । तर अहिले वार्षिक एक लाख रुपैयाँ पनि कमाइ नगरेको उहाँको भनाइ छ ।
कलाको सम्मान नहुनु, राज्यबाट यस्ता नाचको संरक्षण नहुनु, कलाकारलाई प्रोत्साहन नहुनुजस्ता कारणले ऐतिहासिक महत्त्वका यस्ता नाच लोप भइरहेका छन् ।