अग्रज साहित्यिक पत्रकार रोचक घिमिरेलाई ९५ संस्थाको अभिनन्दन

काठमाडौं ।अग्रज साहित्यिक पत्रकार तथा साहित्यकार रोचक घिमिरेको अभिनन्दन गरियो ।
एक भव्य कार्यक्रमका विच नेपाल प्रज्ञा प्रतिष्ठानमा घिमिरेको ८४ औं वर्ष प्रवेशको अवसरमा उनको वृहत् अभिनन्दन तथा रोचक रचना अभिनन्दन ग्रन्थको लोकार्पण गरियो ।

कार्यक्रममा  विगत ६० वर्षभन्दा अघिदेखि साहित्यिक पत्रकारितामा अविछिन्न क्रियाशिल घिमिरे सहित उनकी धर्मपत्नि सुष्मिता घिमिरे समेतलाई प्रमुख अतिथि अभि सुवेदी लगायतले अभिनन्दन  गरे ।

सोमबार प्रज्ञा प्रतिष्ठानमा समाजको आयोजन तथा गुठीको सह आयोजनमा सम्पन्न बृहत् समारोहमा घिमिरलाई कलात्मक ताम्रपत्रसहित अभिनन्दन गरियो । कार्यक्रमका प्रमुख अतिथि प्रा.डा. अभि सुवेदी लगायतका अग्रज व्यक्तित्वले घिमिरेलाई अभिनन्दन गरे । उक्त अवसरमा घिमिरे पत्नी सुष्मिता घिमिरेको पनि उपस्थिति थियो ।

अभिनन्दनपत्रलाई कवि विधान आचार्यले वाचन गरी सुनाएका थिए । ९६ वटा विभिन्न साहित्यिक संस्थाहरू तथा साहित्यिक पत्रिकाहरूबाट सामूहिक रूपमा अग्रज साहित्यकार रोचक घिमिरेलाई अभिनन्दन पनि गरिएको थियो ।

कार्यक्रममा रोचक घिमिरेका बारेमा विभिन्न विद्वानहरूद्वारा अभिव्यक्त गरिएका लेखहरूको सङ्कलन ‘रोचक रचना’ अभिनन्दन ग्रन्थ’को पनि विमाोचन गरिएको थियो ।

लोकार्पित ग्रन्थमाथि डा.शान्ति माया गिरीले संक्षिप्त समीक्षात्मक टिप्पणी पेश गरेकी थिइन् भने ग्रन्थका सम्पादक शेषराज सिवाकोटीले गन्थ्रका बारेमा संक्षेपमा प्रकाश पारेका थिए ।

कार्यक्रममा नगेन्द्रराज शर्मा, प्रा.डा. गोविन्दराज भट्टराई, रमा शर्मा र मोहन दुवालले शुभकामना मन्तव्य राखेका थिए । भैरव पुरस्कार गुठीका उपाध्यक्ष विजय चालिसेले स्वागत मन्तव्य राखेका थिए भने कार्यक्रमको सञ्चालन समाजका महासचिव देविका तिमिल्सिनाले गरेका थिए ।

अभिनन्दित व्यक्तित्व रोचक घिमिरेलाई एक साता अघि मात्र साहित्यिक पत्रकार सङ्घले पनि अभिनन्दन गरेको थियो । कार्यक्रम कक्ष साहित्यकार तथा साहित्य प्रेमीहरूको उपस्थितिले खचाखच भरिएको थियो ।